Haurrentzako bisita gidatuak

Ikaskuntza eta dibertsioa

Badakigu haurrentzat ez dela erraza arreta mantentzea. Horregatik, bisita gidatuak dibertimendu hutsa bihurtu ditugu, jokoz eta ustekabez betetako abentura. Ginkanak, pistak, asmakizunak, talde-lana… Ia konturatu gabe, eta modu dibertigarrian, Enkarterri eta haren historiari buruz ikasiko dute neska-mutilek. Bisitaldiak aukera aparta dira ikasgeletan jorratutako gaien eta edukien osagarri gisa… edo sekulako eguna pasatzeko, bestelako aitzakiarik gabe. Haurrentzat egokitu ditugu gure bisita gidatu guztiak.

Ginkanaz ginkana...

Ginkana baten bidez Bizkaiko hiribildurik zaharrena ezagutzea proposatu nahi dizuegu. Jardueraren hasieran Balmasedako historia kontatuko dugu. Adi egon, hauxe izango baita jardueraren oinarria! Segidan, eta emandako argibideei jarraituz, pertsonaien, istorioen, tradizioen eta museoen bila arituko gara taldeka Balmasedako kaleetan zehar.

ARENATZarte Güeñesen dagoen eskultura parkea da, Villa Urrutia luxuzko etxearen antzinako lorategietan dagoena. Bisita honetan parkea zein etxea bisitatzeko aukera izango dugu. Belarriak zorroztu! Azalpenak ulertzea ezinbestekoa da parte dibertigarrienari ekiteko: ginkanari! Pistak lorategian, eskulturetan eta zuhaitzetan egongo dira ezkutatuta.